Ытыктабыллаах Сахам сирин олохтоохторо!
 
Олунньу 13 күнэ биһиги өрөспүүбүлүкэбитигэр норуот киэн туттар, астына бэлиэтиир бырааһынньыга – ийэ тылын уонна суругун-бичигин күнүн бэлиэтиибит.
Үйэлэргэ симэлийбэккэ, үтүрүйтэрбэккэ, умнуллубакка бүгүҥҥэ тиийэ тиийэн кэлбит төрүттэрбит ийэ тыла бүгүн олох бары эйгэтигэр толору туттуллан сылдьарыгар тылы харыстаабыт, сайыннарбыт чаҕылхай дьоммутугар бука барыларыгар – аата-суола суох үйэлэргэ бытаммыт олоҥхоһуттарыттан, норуот уус-уран тыллаахтарыттан саҕалаан саха норуотун өркөн өйдөөх уолугар Семен Андреевич Новгородовка, тыл сүмэтин норуоттарыгар тириэрдибит саха омук чулуу суруйааччыларыгар, бэйиэттэригэр, судаарыстыбаннай салайааччыларыгар дириҥник сүгүрүйэ махтанабыт! Кинилэр биир модун күүс буола түмсэннэр XXI-с үйэҕэ тиийэ биһиги уонна кэлэр көлүөнэ ыччаппыт төрөөбүт төрүт тылбытынан санаабытын сайгыччы этэн-тыынан, тыыннаах тыргыл тырым тыллаахпыт.

Ийэ тылын үйэтитиигэ, сайыннарыыга Саха Өрөспүүбүлүкэтин Инновацияҕа, сыыппараҕа сайдыы уонна инфокоммуникационнай технологияларга министиэристибэтэ киэҥ өрүттээх биир кэлимсэ үлэни тэрийэн ыытар. Бу үлэни тэрийиигэ биһиги хаһыаттарга, телевидениеҕа, араадьыйаҕа, кинигэни бэчээттээн таһаарар кыһаларга, социальнай ситимнэргэ уо.д.а. үлэлиир өркөн өйдөөх, уран тыллаах-өстөөх биир санаалаахтарбытыгар сигэнэбит, санаабытын, кыахпытын холбуубут. Кинилэр нөҥүө судаарыстыба тылы сайыннарыыга ыытар күүстээх, модун үлэтин тэрийэбит. Бу үлэбитигэр эдэриттэн-эмэниттэн тутулуга суох, араас идэлээх  бары көлүөнэ дьону түмэ тардабыт. Ыытар тэрээһиннэрбит оҕону кыра сааһыттан хабан бука бары уопсастыба чилиэннэригэр туһаайыллар.

Министиэристибэ үлэтин бу хайысхаҕа Ил Дархан Айсен Николаев күүскэ өйүүр. Онон өбүгэ саҕаттан модьу силистээх, омук, норуот быһыытынан уратыбытын чаҕылхайдык туоһулуур ийэ тылбытын – саха тылын аныгы тыыннааммыт кэлэр көлүөнэлэргэ тириэрдэр сорукпутун дьоһуннук толоруохпут.

Ытыктабыллаах Сахам сирин олохтоохторо, норуот самныбат сүдү күүһэ буолар төрөөбүт тылын уонна суругун-бичигин күнүнэн өссө төгүл эһигини эҕэрдэлиибин!  
Өлбөт мэҥэ уута – төрөөбүт сахабыт тыла үйэлэргэ сайда, сириэдийэ турдун!